यसभन्दा पहिले कहिल्यै युगल गीत लेखेँ झैँ लाग्दैन । आज खै किन पो हो युगल गीत लेख्नमा ध्यान गयो । वर्तमान नेपाली समाजमा खासगरि शहरमा; प्रेम गर्नु र विछोडमा पर्नु सामान्य भएको छ । यही पृष्ठभूमीमा एउटा गीत । शब्द भरखर लेखेँ । आफैँलाई राम्रो लाग्यो भने कुनै क्षण संगीत पनि हुने नै छ ।

गायक-
भन केही भन्न खोजे झैँ देखिन्छ्यौ
कलकलाउँदो वैँशमै उदास किन छ्यौ ?

गायिका-
खाली छु हजूर, म त फेरि खाली
बेइमानीले वाचा तोड्यो यसैपाली
जीवनभरको साथ भन्ने गर्थ्यो पलपल
सायद कोही भेट्यो कलकलाउँदी निर्झर

गायक-
सम्बन्ध भनेकै बन्नु, भत्किनु हो
एउटा नै त टुट्यो फेरि गाँसे भैगो
टुट्दै उठ्दा मान्छे केही नयाँ सिक्छ
सम्हालेर सपना फेरि बुने भैगो

गायिका-
हिजो सुम्पेको यो, काया बिटुलो रे
कुरा काट्दै हिँड्ने भीड बीच म छु
कसरी बुनौँ खै फेरि नौला सपना
छियाछिया मनले आफैँ टुक्क्रेकी छु

गायक-
मन चोखो छ भने काया नीलो दह
अँजुलीमा भर्दै छु पिउन तयार म
न बहकिने वाचा तिमी आज बाँध
जीवनभरको साथ छु दिन तयार म

गायिका-
फेरि उस्तै वाचा सुन्दा डर लाग्छ
जीवनभरको साथ भो भो चाहिँदैन
म खेल्न तयार छु मनको चोखो खेल
विन्ति छ झेली गर्न पाइँदैन